كيف بدأ الأدوبي؟ | حكاوي تقنية
الشركة اللي هنتكلم عليها النهاردة شركة عريقة...شركة
اقدم من جوجل ب 16 سنة واقدم من فيس بوك ب 22 سنة.
شركة من أول ما بتصحى من النوم لحد ما بتنام
فانت ببتعامل مع منتجاتها بشكل مباشر أو غير مباشر سواء بعلمك أو من غير علمك...موبايل
كمبيوتر تليفزيون مجلات كتب.
احنا هنتكلم عن شركة من الشركات المحببة الى قلبي احنا هنتكلم عن شركة ادوبي عملاق السوفت وير الأمريكي فالحكاية بدات امتى؟ ووصلت كدا ازاي؟
في اواخر السبعينيات من القرن الماضي اتقابل
جون وارنوك مع تشاك جيسكه في مركز أبحاث شركة زيروكس الشهير في بالو التو parc.
في الوقت ده كانت في مشكلة كبيرة في الترجمة
الدقيقة للصور والنصوص من شاشات الكمبيوتر للطباعة، يعني احنا مش قادرين نلاقي
طريقة نحول بيها اللي بنشوفه على شاشات الكمبيوتر بشكل دقيق لورقة مطبوعة.
الاتنين فكروا في لغة برمجة مبتكرة ممكن انها
تعمل ثورة في الطباعة ومعالجة الصور والنصوص في العالم.
فسابوا المختبر اللي كانوا شغالين فيه وطوروا
طريقة جديدة جذرية لطباعة النصوص والصور على الورق.
وسنة 1982 اعلنوا عن انشاء شركتهم الأولى
شركة ادوبي وده الاسم اللي اختاروه على اسم مجرى مائي صغيركان موجود ورا بيت
وارنوك في لوس التوس في كاليفورنيا.
والشركة دي طلعت منتجها الأول postscript ودي عبارة عن لغة بتوصف الصفحة اللي على
شاشة الكمبيوتر من حيث الشكل والحجم والمكان بالتحديد وده طبعا خلانا احنا البشر
قادرين اننا نطبع ملف الكمبيوتر بالظبط بالظبط زي ما بيظهر على الشاشة...
شركة ابل اللي كانت اتاسست سنة 1976 اول ما
سمعت عن الاختراع المذهل ده راحت اشترت بسرعة سنة 1983... 15% من اسهم شركة ادوبي
واصبحت اول شركة تاخد ترخيص باستخدام لغة ال post script واصبحت شركة ادوبي اول شركة في بالو التو
تحقق ارباح في العام الاول ليها.
وفعلا سنة 1985 قدمت ابل اول طابعة متوافقة مع
الماك بتعتمد على التقنية الثورية دي وهي طابعة laser writer وكانت بتستخدم محرك طباعة ليزري طورته عملاق
البصريات شركة canon.
والطابعة دي
غيرت شكل العالم لان الجمع بين PostScript وطباعة الليزر كان بيمثل يتقدمًا
كبيرًا في جودة الطباعة ومرونة التصميم...خلتك حرفياً قادر تطبع اي تصور انت
بتتخيله وتنفذه على شاشة الكمبيوتر كانك قاعد بتلعب على الورق...بفضل التقنية دي
خلت اي شخص عادي يقدر يعمل تقارير بمظهر احترافي ومن غير معدات الطباعة القديمة
الضخمة الغالية ومن غير حتى اي تدريب وانتج نوع جديد اسمه " النشر
المكتبي"
بداية كبيرة يا
ادوبي...اتعبتي من بعدك...تخيل كدا لسه بتبدأ شركة قامت الشركة دي عملت تغيير ثوري
في العالم
ولكن تأتي الرياح بما لا تشتهي السفن فعلى الرغم من نمو ايرادات ادوبي ل 168.7 مليون دولار سنة 1990 الا انه حصل خلاف بينها وبين ابل على ترخيص ال post script فقامت ابل اعلنت عن نيتها لبيع اسهمها في شركة ادوبي وانهم هيتفقوا مع العملاق ما يكروسوفت ويطوروا نسخة محسنة من البوست اسكربت يدخلوا فيها تقنية عرض خطوط جديدة...
في ظل ما الحرب دي شغالة وده بيطلع بتصريحات وده يقول يا ولا
اسكت يا ولا...كانت ادوبي طورت في سنة واحدة بس تعديل على ال post script سموه ال true type وده بيخليك تطبع باكتر من خط مستخدم على
شاشة الكمبيوتر مش خط واحد بس.
فراحت جاية ابل وما يكروسوفت قايلين لها يوووه يا ادوبي يا اخي انت بتتقمص
بسرعة كدا وتخلت مايكروسوفت عن تطوير نسخة postscript
الخاصة بيها واعتمدت تقنية ال truetype بتاعة ادوبي... في انظمة التشغيل بتاعتها.
واتعرفت الواقعة دي بحرب الخطوط.
في التسعينات استمرت عائدات ادوبي من ترخيص بوست اسكربت وزودت الغلة بقرشين
من مبيعات الخطوط اللي طورتها في حرب الخطوط...لحد ما وصلت سنة 1998 adobe type library ل 2500 خط ...
انت متخيل؟ بعد ما كان تطبع وتكتب بخط واحد بس لا انت بقيت قادر تختار وتطبع ب 2500 خط بتدعمهم ادوبي.
طيب هل ده اللي كانت بتعمله ادوبي على مدار18 سنة بس؟
كان عندهم مصدر دخل تاني مهم جداً وهو بيع البرمجيات "شغلانة كدا بعد
الظهر"
صحيح في البداية كانوا بينتجوا برامج للماك بس لكن بعد كدا وفروا برامجهم دي لكل انظمة التشغيل.
طيب ايه أول برنامج عملوه بقا؟
اول برنامج هو برنامج ادوبي اليستريتور سنة 1987 ودي كانت معلومة غريبة
بالنسبة لي لاني زي كتير من الناس كان فاكر ان التحفة الشهيرة فوتوشوب كان الأول
لكن لا الاول هو الاليستريتور وكان مبني على لغة ال post script برضو وكان موجه للمصممين والفنانين
والرسامين...
وفي سنة 1990 يعني بعد اليستريتور ب 3 سنين انتجوا العملاق ادوبي فوتوشوب
واللي حقق نجاح وانتشر اسرع واكبر بكتير من برنامجهم الاول اليستريتور وهو تطبيق
لتعديل وتحسين الصور الفوتوغرافية يعني اللي متصورة اللي طالعة من كاميرات.
والثورية في الفوتوشوب كانت انه من اوائل البرامج على الاطلاق اللي بتتيح لمطورين من برة الشركة المنتجة في ادخال ميزات جديدة من خلال مكونات اضافية يقدروا يدخلوها للبرنامج اللي بنسميها دلوقتي plugins والميزة دي خلت الفوتوشوب ياكل السوق.
وبعد كدا بدات ادوبي تقدم برامج كتيرة ومختلفة عن طريق سياسة الاستحواذ
يعني انت عملت برنامج حلو جميل...البرنامج ده يلزمني يا كبير...وتشتريه وتطوره
فقدمت سنة 1991 برنامج ادوبي بريمير وده برنامج لتحرير ومعالجة الفيديو
وبالمناسبة هو البرنامج اللي معمول بيه الفيديو ده.
وفي سنة 1993 اطلقت شركة science
and art برنامج الافترافكت لانشاء الرسوم المتحركة
والتاثيرات البصرية لكن سريعا سنة 1994 استحوذت على الشركة شركة ادوبي واصبح واحد
من اهم منتجاتها.
وفي اواخر التسعينات كان انتشر الكمبيوتر اكتر وبدا الناس يقولوا وانا اطبع
على ورق ليه؟ ما انا اقرا على الشاشة واشارك ملفاتي برضو على الشاشة وخلاص...
فشمت ادوبي ريحة الاتجاه ده ببعد نظر منقطع النظر واطلقت فئة ادوبي acrobat لتوفير تنسيق قياسي لتوزيع المستندات الإلكترونية...وده خلاك بمجرد تحويل المستند إلى تنسيق Acrobat (PDF) ، بغض النظر عن أصوله ، يخلي مستخدمي أي نظام تشغيل كمبيوتر يقدروا يقراوه ويطبعوه بالتنسيق والطباعة والرسومات زي ما هي تقريبًا، من خلال تطبيق Acrobat Reader. واللي قدمته الشركة بشكل مجاني.
وفي سنة 1997
بقا اكتر من 80% من ارباح ادوبي جاي من مبيعات التطبيقات.
وفي سنة 2005 قدرت شركة ادوبي تستحوذ على شركة macro media ودي كانت الشركة المنتجة لبرنامج macro media freehand واللي كان منافس رئيسي لادوبي اليستريتور.
وسنة 2008 قدموا برنامج adobe
media player علشان ينافس Apple iTunes و Windows Media Player وده
برنامج كان قادر انه يشغل ملفات الميديا بصيغات متنوعة على اجهزة الكمبيوتر يعني mp3 mp4 3gp avi وهكذا لحد ما تم اعتماد Adobe Media Player من عديد من أجهزة التلفزيون يعرضوا بيه
المحتوى.
وهاهي الان في 2020 ادوبي بتضم اكتر من 20 برنامج متخصص في اكتر من مجال ولما نقول برنامج يعني برنامج مش اي حاجة كدا وخلاص...ادوبي لما بتقدم برنامج بيكون الاقوى او على الاقل من الاقوى في فئته.
وبتتميز مجموعة
ادوبي دي بالترابط بينها والسلاسة في التنقل والاستخدام بشكل انا شخصياً بحبه.
وبس كدا يا سيدي
دي كانت قصة ادوبي لو عجبتك ما تنساس تشترك في القناة وتفعل الجرس علشان يوصلك
اشعار بالحلقات الجديدة وقولنا تحت في التعليقات يا ترى حابب تشوف شركة ايه تاني
في حكاوي تقنية؟
ليست هناك تعليقات